EKITONGOLE ekikola ku mutindo gwe bintu ebikolebwa mu Ggwanga ne biyingizibwa kiliko abyuma 160 ebyeyambisibwa mu kusiba waragi bye kiggadde mu Kampala nga omu ku kawefube w’okukendeeza omwenge okusibwa mu buveera Gavumenti gwe yawera gye buvuddeko.
Ebyuma bino bigaddwa okuva mu makkolero 37, era nga ekikwekweto kiyindidde mu Disitulikiti okuli Wakiso, Mukono, Jinja ne Mityana.
Nga eno abakozi UNBS baakedde ku makya ne basalako amakolero gano era ne bakwata ebintu byonna ebyeyambisibwa ku kusiba waragi mu buveera.
Minisita we by’obusuubuzi n’obwegassi America Kyambadde ye yayisa ekiragiro kyokuggala amakolero agakyasiba waragi mu buveera okutandika nga 1.06.2019, era nateekawo akakiiko akaali kagenda okuteekesa mu nkola kino, okwali abakungu okuva mu bitongole ebyenjawulo okuli ekitongole ky’omutindo mu ggwanga n’ekyebyobutonde okukwata saako n’okuggala amakolero agefunyiridde okukola omwenge mu buveera.
Akulita ekitongole kya UNBS Dr. Ben Manyindo agambye nti bakakasa nti engeri gye baggadde ebyuma bino bagenda kukendeeza ku mwenge gw’omubuveera ogubadde gufulumizibwa mu ggwanga.
Agambye nti bakizudde nti webakoledde ekikwekweto omwenge ogumu gubadde gumaze okufulumizibwa okuva mu makkampuni nti kyokka ekibinja kya bakozi b’ekitongole abakola ku kyokulemesa omwenge okugutunda bakola butaweera okusobola okugulemesa okweyongerayo mu butale obwenjawulo.
Do you have a story in your community or an opinion to share with us: Email us at editorial@watchdoguganda.com