OMUBAKA wa Kyadondo East mu Palimenti Robert Kyagulanyi Sentamu asabye omulamuzi wa kkooti y’okuluguudo Buganda Ketty Achaa Joan agobe omusango ogwamuwawabirwa ogw’okujeemera ebiragiro bya Poliisi.
Bwabadde alabiseeko olwaleero okusobola okuwulira emisango egimuvunanibwa, nga gino gyamuggulwako ku ntandikwa y’omwaka guno ye ne banne bwe beekalakaasa nga balaga obutali bumativu eri omusolo ogumanyiddwanga OTT.
Akuliddemu oludda oluwaabi Barbra Kyomugisha agaanyi okusaba kwa Kyagulanyi nagamba nti babadde bakyetaagayo akadde okusobola okuyita abajulizi bonna bajje mu kkooti, yadde nga ne Puliida wa Kyagulanyi Luyimbaazi Nalukoola naye abadde asabye omuwaabi wa Gavumenti okukkiriziganya n’okusaba kw’omuntu we.
Nalukoola agambye nti kkooti etutte obudde bungi ku musango guno, kyokka nga abantu be baawolereza beetegefu okuwozesebwa, nagamba nti Gavumenti bweba terina kigendererwa mu musango guno egugobe.
Omulamuzi Ketty Achaa omusango agw’ongeddeyo okutuusa nga 17 omwezi gw’omwenda omwaka guno.
Mu kusooka wabaddewo katemba mukulu wa Kyagulanyi amanyiddwanga Fred Nyanzi wawonedde awatono okuteekebwako ekibaluwa ki bakuntumye oluvanyuama lw’okulwawo okutuuka mu kkooti, nga banne babadde mu kaguli nga ye talabikako.
Wabula oluvanyuma Nnyanzi atuuse era omulamuzi n’amutegeeza nti abadde agenda kulagirwa akwatibwe olw’obutalabikako mu kkooti.
Do you have a story in your community or an opinion to share with us: Email us at editorial@watchdoguganda.com
