ABATUUZE abawangalira mu bitundueby’enjawulo mu kibuga kye Ggwanga ekikulu Kampala balaajanidde KCCA okubataasa ku makubo mu bitundu byabwe agajjuddemu ebinnya ebivuddeko obubenje okweyongera n’akalippagano k’ebidduka ssaako abamenyi b’amateeka okuzifuula empuku yaabwe.
Ebinnya biri mu luguudo oluva e Mpereerwe okudda mu Kiti nga biri mu maaso g’ekkanisa ya St. Stephens e Mpereerwe n’essomero lya KCCA erya Mpereerwe Pulayimale abatuuze bye bagamba nti bizze bivaako obubenje , mmotoka okutubirirawo n’abamenyi b’amateeka okuteegerawo abantu ne bababba naddala ekiro.
Ebilala bili ku luguudo acacia avenue olugatta ebitaala bya FairWay ku Kamwokya olw’atongozebwa akolanga Executive Director wa Kampala Andrew Kitaka gye buvuddeko, era nga bwe yali alutongoza yagamba nti omulimu gugenda kutandikirawo, okuli okulugaziya saako n’okulukola lubeera kawerette.
Wabula ate ekyewunyisizza abatuuze kwe kuba nti kati ate ekitongole kya KCCA mu kifo ky’okulukola ate basazeewo kuziba binnya ebibaddemu ate nga n’ebimu baalese tebabikoze ekintu kye bagamba nti sikyabwenkanya kubanga bawa emisolo mingi mu kitongole kya KCCA.
Samuel Luyima agamba nti nti abakozi ba KCCA baakuba ebifaananyi oluguudo lwe Mpererwe kati omwaka mulamba nti kyokka tebakomangawo kubaako kye bakola kyagamba nti bandiba nga baberabira dda.
Yagasseko nti abamenyi b’amateeka mu kifo kino baafulawo kya kutegeerawo bantu ne babba okuva ssaawa 5:00 ez’ekiro ng’okusinga bataayiza ba bodaboda eziba zitaddeko abasaabaze ne babanyakulako obusawo.
Yayongeddeko nti abeebigere baalaba tebalina we bayita ne bateekawo akakubo ku lukomera lw’essomero nga mu kiseera kino ate aba bodaboda ke bakozesa Mike Ssemakula omuwanika wa LC y’e Nammere – Mpereerwe yategeezezza nga bwe bazze beemulugunya ku kkubo lino ne batayambibwa.
Ismael Ntale omumyuka wa meeya w’e Kawempe yategeezezza nti ensonga KCCA egimanyiiko era mu bbanga ttono bagenda kuzibukula ebigoma ebyazibikira bateekewo ne ka kkoolaasi mita 40.
