Omusumba Sebuguzi naye alumirizza Nantaba okubawukanya ne Bugingo, Yali tayagala musemberere

OMUSUMBA Martin Sebuguzi eyayawukana ne n’omusumba Aloysias Bugingo gye buvuddeko naye avuddeyo nayatula ekyama nti naye ekyamwawukanya ne Paasita Aloysius Bugingo yali muwala Susan Nantaba Makula.

Sebuguzi okwogera kiddiridde muka Bugingo, Teddy Naluswa okuvaayo n’alumiriza omuwala Nantaba okubeera nga ye yamalawo essanyu ly’obufumbo bwabwe, oluvannyuma lw’okuganza bba gw’amaze naye emyaka 29.

Naluswa era yategeezezza nti Nantaba y’emu ku nsonga eyayawula Sebuguzi ne bba wadde nga Bugingo yavaayo ne yeekangabiriza n’ajingirira ensonga omuli n’okulumiriza Sebuguzi okumuwa obutwa emirundi ebiri nti kyokka n’asimattuka. Sebuguzi yagambye nti ye yali maneja wa Salt Radio eya Bugingo era bwali buvunaanyizibwa bwe okunoonya abakozi n’okubabangula mu buweereza era mu mbeera eyo mwe yafunira Nantaba n’amuwa omulimu. Agamba nti bwe yaweebwa obwamaneja bwa leediyo yalina okunoonya abantu ab’okukola nabo.

Yalowooza ku Nantaba gwe yali alese ku Alfa leediyo eya Dr. Joseph Serwadda n’amukimayo kuba yali amulabye nga bw’amukolamu omulimu asobola okubeera omulungi. “Namuyigiriza buli kimu ne Bugingo n’asiima obuweereza bwe.

Kino kyatuusa Susan okulowooza nti buli kye nkola naye yali akisobola” Sebuguzi bwe yagambye.

Agamba nti ekiseera kyatuuka omuwala n’abeera nga ne lw’atajje ku mulimu takyayogera era nga bw’abeera ku mulimu alaga nti alina obuyinza bungi n’okusinga maneja. “Bwe nneemulugunyanga ng’ebyange omukulu tabitwala nga nsonga, okutuusa lwe yangoba nti buli kimu basobola okukyekolera” Sebuguzi bwe yayongeddeko.

Yategezezza nti Bugingo yawuliranga bubi buli lwe yalabanga Sebuguzi okumpi ne Nantaba. Ayongerako nti kino kyali kimweraliikiriza bwereere kuba enkolagana yaabwe yali ekoma ku bya mirimu. “

Ku by’okutabuka kwa maka ga Bugingo Sebuguzi yagambye nti takuwagira era akuvumirira kubanga engeri gye bali bantu ba kkanisa kiba kirabika bubi eri abagoberezi.

Yakkaatirizza ebyayogeddwa Naluswa nti Bugingo eky’okuwaayirizanga abantu b’atabuse nabo nti babadde bagenda kumuwa butwa akikozesa kwonoona mannya g’abantu abo. Muka Bugingo yamwogeddeko nga omukazi ow’amazima era omuweereza wa Katonda atabwerimbiseemu bwerimbisi.

Do you have a story in your community or an opinion to share with us: Email us at editorial@watchdoguganda.com