Ababaka b’abavubuka bavuddeyo okulwanirira Fresh Kid, baagala Gavumenti emusomese.

Babadde boogerako ne bannamawulire ku Palimenti enkya ya mande ne bategeeza nti Minisita alina okufaayo okulaba nga omwana Patrick Ssenyonjo asoma ate nga asomera mu massomero amalungi kubanga agenda kufuuka w’amugaso eri eggwanga naddala mu kiseera kino nga n’abaana abasoma tebalina mirimu.

Basabye abamuyambako mu kuyimba kwe obutasika nnyo muguwa n’amateeka, wabula balabe engeri gye bagenda okukulakulanya ekitone ky’omwana nga tebakontanye nnyo n’amateeka.

Kino kizzeewo oluvanyuma lwa Minisita w’abavubuka n’abaana Florence Nakiwala Kiyingi okulagira omuyimbi omuto Fresh Kid okussa wansi emizindaalo gy”okuyimba nga agamba nti emyaka gye tegikkirizibwa kukola by’akola.

Ssenyonjo ennaku zino asazzeeko ekisaawe ky’okuyimba olw’ennyimba z’ayimba ate nga abantu bamwagala nnyo, kyokka ye Minista Nakiwala agamba nti emyaka gyalina gikontana n’amateeka agafuga abaana mu Ggwanga.