Ddala kituufu ab’essomero lya St. Lawrence bakaka abayizi omukwano? Babaka bagenzeeyo betegereze

Bya Moses Kizito Buule

ABABAKA ba Palimenti ab’alondebwa okunonyereza ku bigambibwa nti emize gy’okukaka abayizi omukwano mu massomero gissusse, ku lw’okubiri boolekedde massomero ga St. Lawrence schools nga kw’otadde ne Yunivasite okusobola okwetegereza embeera eriyo, oluvanyuma lw’okufuna amawulire nti eno omuze gw’okukaka abayizi omukwano be baana baliwo.

Kino kiddiridde Ababaka okufuna okw’emulugunya okuva mu bantu ab’enjawulo nga balaga nga abayizi mu massomero gano bwe babatuukirira nga babasaba okubayamba ku baddukanya amassomero gano omuli abasomesa n’abakozi abalala olw’okubatulugunya nga babapeeka omukwano olw’ebigendererwa eby’enjawulo, oluusi omuli okubasibako emisango egitaliimu, okubongeza obubonero ne bilala, nga bino gye biggwera okubasonyiwa baba baagala kusooka  kwegatta nabo.

Kinajjukirwa nti eyali omutandisi wa massomero ga St. Lawrence omugenzi kati Prof. Lawrence Mukiibi yafa nga alina abamu ku baali abayizi mu massomero ge b’eyazaalamu abaana.

Omubaka Godfrey Katushabe akiikirira essaza ly’eBukonjo agamba nti babaddeko mu Disitulikiti omuli ey’e Bundibugyo ne Ntoroko ne bakizuula nga abaana bangi bakabasanyiziddwa abasomesa, abakulu b’amassomero saako n’abakozi b’emirimu emilala mu massomero.

Yagambye nti ye ne babaka banne tebagenda kuttira Musomesa yenna ku riiso singa banamusanga nga y’enyigidde mu bikolwa by’okukabassanya abayizi, kubanga bakizudde nga kye kimu ku bivuddeko omuwendo gw’abaana bangi ab’obuwala abawanduka mu massomero okw’eyongera.

Yanyonyodde nti bagenda kutambula mu massomero gonna kubanga emize gino gifuuse mingi, ate nga abayizi abato bebasinga okukosebwa kubanga ebiseera byabwe eby’omumaaso biba bizingamiziddwa abandibadde babizimba.

Akakiiko kano katondebwawo oluvanyuma lwa Sipiika Rebecca Kadaga okufuna okwemulugunya buli kiseera nga kuva mu bazadde n’abayizi, nga bamuloopera engeri abakulu b’amassomero saako n’abasomesa gye batulugunyamu abayizi ne batuuka n’okubakaka omukwano ku buwaze.