ENKAAYANA z’ettaka okutudde ebizimbe okuli Qualicel, Jamboree ne Nabukeera Plaza zikyalanda aba baasi bwe bavuddeyo nabo ne bagenda mu kkooti enkulu nga bagamba nti ettaka lino si lya Drake Lubega, Mansur Matovu Yanga oba aba Horizon Coaches wabula lyabwe.
Eggulo abasuubuzi abaaloopa Drake ne Yanga baabadde ku kkooti enkulu ewozesa emisango gy’ettaka gye baasabidde omulamuzi Alexandria Nkonge abakkirize ssente z’okupangisa amaduuka agali ku bizimbe bino batandike kuziteeka ku akawunti kkooti gy’eneebateerawo okutuusa nga kkooti emaze okusalawo aninnanyini bizimbe bino omutuufu. Mu musango guno aba UBOAL mwe baagambidde nti bakaayanira ettaka lino era tebakkiriziganya na Drake Lubega ne Yanga oba aba Horizon Coaches kya kusasula ssente zino.
Yagambye nti Drake ne Yanga tebalina kiragiro kya kkooti kyonna kye bakozesa kutwala bizimbe wabula bakozesa lyanyi.
Ye omulamuzi Nkonge yalagidde abasuubuzi okuteeka okusaba kwabwe mu buwandiike nga muno mwe bagenda okumunnyonnyolera ensonga lwaki baagaala baweebwe akawunti kwe baba bateeka ssente z’obupangisa mu kifo ky’okuziwa Drake ne Yanga.
