BANNAMAWULIRE ba BBC abakwakwatiddwa Poliisi mu kiro ekyakeesa olw’okuna wamu ne Mukyala wa Munnamawulire Solomona Serwanja ne baggalirwa ku CPS mu Kampala kyadaaki bayimbuddwa ku kakalu ka Poliisi.
Abatereddwa kuliko Kssim Muhammad, Rashid Kaweesa, Godfrey Badebye ne Vivian Nakaliika ono nga ye Mukyala wa Serwanja.
Bano okukwatibwa kyaddiridde poliisi okugenda mu maka ga Serwanja agasangibwa e Mukono ne baazayo, kigambibwa nti ne basangayo eddagala lya Gavumenti.
Mu kiseera ekyo Serwanja teyabadde waka era nga kigambibwa nti yabadde ali ku mulimu gw’okunoonyereza ku bantu n’abakungu ba Gavumenti ababadde beenyigidde mu kubba eddagala lya Gavumenti elirina okugenda mu malwaliro ne balitunda.
Ku makya ga leero Serwanja akedde kugenda ku CPS wakati mu by’okwerinda ebyamaanyi, oluvanyuma lw’okwevumba akafubo n’abakulu ba Poliisi bannamawulire ne mukyalawe bonna ne bayimbulwa.
Kitegerekese nti bannamawulire bano bwe baali bagenda okutandika okukola okunonyereza kuno, baategezaako Minisita omubeezi ow’ebyobulamu Sara Opendi, era yalagidde bayimbulwe bwe yategezezza abakulu mu Poliisi nga bano bwe baamusaba olukusa gye buvuddeko.
Eddagala elibadde linonyerezebwaako lye lyali lirina okukozesebwa abaselikale b’amaggye wakati mu kujjanjaba abantu okw’obwerere UPDF kwe yategeka okwetoloola eggwanga nga bakuza olunaku lwa TAREHE SITA.
Okukwatibwa kwa bannamawulire bano kuvumiriddwa ensi yonna wamu n’ebitongole ebilwanirira eddembe ly’abanamawulire.
Obubbi bwe ddagala mu malwaliro ga Gavumenti bwafuuka baana baliwo era nga olumu kyatuusa nE Minisita Sarah Opendi okwesiba akakaaya naayingira eddwaliro lya Kiruddu nga tewali amanyi era naabaako abasawo be yakwata.
Do you have a story in your community or an opinion to share with us: Email us at editorial@watchdoguganda.com
