Museveni akyalidde Kabaka n’amukuba akaama, ensimbi n’ebyapa byonna bye mubanja ngenda kubisasula

PULEZIDENTI Yoweri Museveni awubyeeko olubu lwe kigere mu Lubiri lwa Kabaka wa Buganda Ronald Muwenda Mutebi olusangibwa ku kyalo Banda ekiri mu Ssaza lye Kyadondo, naamukuba akaama akamusanyudde nti bulijjo ebintu by’amaze ebbanga eddene ng’abanja, omuli epyapa bye ttaka eby’asigalayo saako n’ensimbi byonna agenda kubimusasula.

Museveni abadde awerekeddwako Ssabawolereza wa Gavumenti William Byaruhanga nabalala, ate Kabaka abadde amulinze ne Mutoowe Omulangira David Kintu  Wassajja nabalala.

Mu kusooka bombiriri basoose ne boogerako mu lujjude lwabantu ababaddewo okwaniriza, kyokka oluvanyuma beevumbye akafubo akatakkiriziddwamu muntu yenna.

Ensonda zitegezezza nti ezimu ku nsonga ezisitudde Omukulembeze we Ggwanga kubaddeko okukomyawo ebyapa byonna ebye ttaka ebibadde bikyabanjibwa Gavumenti ya wakati, nga bino kuliko eby’embuga z’amaSsaza n’amagombolola agasangibwa mu Buganda.

Ekilala kubaddeko ensonga eyensimbi aziri mu Buwumbi ez’asigalayo, nga zino zaali z’abupangisa okumala ekiseera Gavumenti kye yamalanga ekolera mu bizimbe by’obwaKabaka.

Museveni agambye nti amaze okulagira Minisitele ye by’ensimbi okukola ku ntekateeka y’okusasula ensimbi ezibanjibwa amangu ddala, nti era n’ekitongole kye bye ttaka kimaze okukola ku nsonga ye byapa byonna era bisigalidde kukwasibwa Kabaka.

ObwaKabaka bumaze ebbanga ddene nga bubanja ebintu byabwo ebyali by’awambibwa obukulembeze bw’omugenzi Milton Obote mu mwaka gwa 1966, oluvanyuma lw’okuwangangusa Ssekabaka Sir Edward Muteesa eyali Omukulembeze wa Uganda eyasooka.

Pulezidenti ennaku zino azze akyalira, n’okukyaza abakulembeze be nnono, nga ku nkomerero y’omwaka oguwedde yakyaza Omukama wa Tooro Oyo Nnyimba Kbamba Iguru mu makaage e Nakasero nga wano baateesa ku kya Gavumenti okuzza eby’obugagga by’obukama bynna.

Ono era mu mwezi gwe 12 yali mugenyi mukulu ku mukolo gwa Isabaruuri Costance Mwogezi Butamanya ogwali e Nakasongola oluvanyuma lw’okumala akaseera nga takkiriza kugenda ku mikolo gy’aBaruuli.