OMUDUUMUZI wa poliisi mu ggwanga, Martin Okoth Ochola asunsudde abaserikale 120 n’abazzaayo mu ttendekero e Kabalye Masindi, nga omu ku kawefube w’okuddamu okubabangula mu bukodyo obw’enjawulo basobole okutuukana n’omutindo gwa Poliisi kweri kati.
Mu kiwandiiko ekyafulumiziddwa poliisi nga January 2, 2019 nga kiriko omukono gw’amyuka akulira ekitongole ekivunaanyizibwa ku nzirukanya y’emirimu mu poliisi, SCP Geoffrey Musana abaserikale abasunsuddwaamu basabiddwa okweyanjula mu ttendekero nga January 13, 2019 olwo batandikirewo enkeera nga January 14, 2019.
Abaserikale abasunsuddwaamu balagiddwa okutwala ebikozesebwa omuli yunifoomu bbiri n’ebyetagisa ebirala ebyeyambisibwa mu kutendekebwa mu bbanga lye banaamalayo.
Ensonda mu poliisi zaategeezezza nti, abaserikale abasunsudwaamu be bagenda kutendeka abaserikale abapya poliisi beenatera okuwandiika gye bujja.
Poliisi yali yayimirizaamu okuwandiika abaserikale abapya okusobola okuddamu okutendeka n’okubangula abaliwo batuukane n’omutindo n’okufuna abakolera mu bitongole ne ofiisi ez’enjawulo okusinziira ku busobozi bwabwe.
Abamu ku baserikale abagenda okutendekebwa kuliko: ASP Muhammad Byansi akulira poliisi y’e Nateete, ASP Francis Liiga akulira poliisi y’e Nakasero, ASP Alex Bakobe okuva e Nsangi, ASP Paul Kadoogo okuva e Mukono, ASP Abdu Ssekyanda okuva e Kabalagala, ASP Twaha Kasirye okuva e Nsangi, ASP Bashir Lwegaba Kakooza okuva e Bwera n’abalala.
Do you have a story in your community or an opinion to share with us: Email us at editorial@watchdoguganda.com
