Banange mufune endaga muntu, Bobi Wine akuutidde abavubuka b’eNakaseke

Bya Moses Kizito Buule

OMUBAKA wa Kyadondo East Robert Kyagulanyi Ssentamu asabye abavubuka okuva mu muzannyo gwe balimu ennaku zino wabula bagende yonna gyebawandikira bafune endaga muntu nga elimu ku makubo mwe bagenda okuyita okukyusa obukulembeze budde mu bantu ab’emyaka gyabwe.

Kyagulanyi agamba nti omuvubuka awezezza emyaka 18, naye nga talina ndaga muntu oyo aba ssi wabuvunanyizibwa, kubanga aba tabalirwa mu bantu abo abayinza okwetaba mu kusalirawo eggwanga lye butya bwe lirina okutambula, wabula aba agirina asobola okuvaayo n’ayogera ekimuluma kubanga aba abalirwa mu bannaUganda abajjuvu.

Okw’ogera bino yabadde mu makaage agasangibwa ku kyalo Magere mu Disitulikiti ye Wakiso, bwe yabadde asisinkanye abavubuka okuva mu Disitulikiti ye Nakaseke, abakulembeddwamu omuwanika w’ekibiina ekigatta bannnamawulire mu ggwanga Esther Nakawooya era nga yalubirira okwesimbawo okukikirira Disitulikiti ye Nakaseke ku kifo kya Bakyala mu Palimenti omwaka 2021.

Kyagulanyi yabategezezza nti balina okunywera saako n’okugumira buli ekijja nga olwo lwe banasobola okwetaba mu kuleeta enkyukakyuka mu ggwanga lyabwe.

Ye Nakawooya eyakulembeddemu abavubuka bano yalaze obwetaavu eri ababaka abakikirira abavubuka okuvaayo okw’ogera ensonga eziruma abavubuka mu ggwanga omuli ebbula ly’emirimu, obwavu, okukozesebwa nga tebasasulwa ne bilala, bye yayogeddeko nga ebivuddeko abavubuka okuggwaamu amaanyi ne batuuka n’okutandika okw’enyigira mu mize emikyamu omuli obubbi n’okukozesa ebilagaralagara.

“Abavubuka bangi basomye naye tebalina mirimu, ate ekisinga okwenyamiza tewali ab’ogerera, ne bwe wandibaddewo ababoogerera nabo tebamanyi biluma bavubuka, kale ffe ffenyini tulina okw’ebereramu tulabe nga tutwala ab’emyaka gyaffe mu bukulembeze basobole okulwanirira ebituluma.” Nakawooya bwe yagambye.

Bonna awatali kw’esalamu baasuubizza okuwagira Pulogulaamu zonna Kyagulanyi z’anateeka mu nkola okusobola okubayambako okwekulakulanya mu kitundu kye Nakaseke.

Bamutonedde ebirabo omw’abadde amatooke, enkoko ne bilala.