AB’OLUDDA oluvuganya Gavumenti ebintu by’ongedde okuboononekera omu ku bantu baabwe abadde asinga okubawagira n’okusuuta ekisinde kya People Power nga kwotadde n’omukulembeze waakyo Bobi Wine, Jenifer Nakanguubi amanyiddwanga Full Figure okubasuulawo ne yegatta ku Pulezidenti Yoweri Kaguta Museveni ne NRM mu butongole.
Full Figure okwegatta ku Museveni kiddiridde okumala ennaku eziwerako emabega nga alaga nga bwayagala okwegatta ku Gavumenti nti kubanga yabadde akizudde nti ab’oludda oluvuganya tebalina gye bagenda kutwala Ggwanga nga bafunye obuyinza.
Ono abadde ennaku zino yabefuulira era nga aboogerera ebisongovu, omuli n’okweyagaliza bokka na bokka nga baatuuka n’okumumma ekifo kyonna mu bakunzi ba People Power abaalondebwa Bobi Wine gye buvuddeko kwetolola eggwanga lyonna.
Ku lw’okusatu olweggulo kigambibwa nti eyakalondebwa ku bawabuzi ba Pulezidenti Catherine Kusasira saako n’omutegesi we bivvulu ate nga nfa nfe wa Pulezidenti Balaam Balugahare baatutte Full Figure mu maka g’omukulembeze we Ggwanga Entebbe era ne basisinkana ne babaako bye batesezza eby’ekyama.
Kitegerekese nti Full Figure omukulembeze yamuwadde omulimu gw’okuyamba abayimbi abato saako n’okubakunga okuwagira ekibiina kya NRM naye kye yakkirizza okukola awatali kutiisibwatiisibwa.
Full Figure ono yalabikako emabegako ng’ajjamu omujoosi gwa People power nasigala bwerere nga alaga obutali bumativu olw’okusosolebwanga abakulembeze be kisinde.
Do you have a story in your community or an opinion to share with us: Email us at editorial@watchdoguganda.com