EKITONGOLE kya Poliisi ekikola ku kunonyereza ku misango ekituula e Kireka (SIU) kyadaaki bayimbudde abasajja 3 abagambibwa okuba nti bamanyi ku by’okutemula eyali omwogezi wa Poliisi ye Ggwanga omugenzi kati Andrew Felix Kaweesi ababadde bamaze ennaku 19 mu kabula muliro.
Abayimbuddwa kuliko Yusufu Nyanzi, Jibril Kalyango ne Yusuf Mugerwa abaali baddamu okukwatibwa nga 11 ogw’omwenda oluvanyuma lw’okuteebwa omulamuzi wa kkooti ewozesa egya bakalintalo Lydia Mugambe.
Nga bakamala okukwatibwa Poliisi yabaggulako omussango gw’okwetaba mu bikolwa eby’obwanalukalala saako n’okukolagana ne kibiina kya bayekera ekya Allied Democrati Forces (ADF)
Oluvanyuma lw’okuteebwa e Kireka bano nga bakulembeddwamu Puliida waabwe Anthony Wameli bagenze mangu mu kkooti enkulu mu maaso g’omulamuzi Henrietta Wolayo gye babagiddeko emisango gyonna oluvanyuma lw’abawaabi ba Gavumenti okujja enta mu misango egibavunanibwa.
Bano baakwatibwa mu mwezi gwe 10 omwaka 2017, era ne batwalibwa mu kkooti enkulu olw’emisango gy’obutemu egyali gibavunanibwa.
Oluvanyuma banaabwe okuli Umar Maganda, Ahmed Ssenfuka, Sheikh Musa Ntende, Hassan Tumusiime, Ibrahim Kissa, Hamid Magambo, Abdul-Majid Ojerere, Sauda Ayub, Osman Muhammed Omar, Asuman Mugoya, Ibrahim Ssemwanga ne Swaleh Ddamulira, baatebwa 3 ne basigalayo nga Poliisi bwe genda mu maaso n’okunonyereza.
Do you have a story in your community or an opinion to share with us: Email us at editorial@watchdoguganda.com
