OMUBAKA wa Kyadondo East mu Palimenti Robert Kyagulanyi Ssentamu amanyiddwanga Bobi Wine avuddeyo nategeeza nti teri kigamba kiyinza ku mussa wansi ave ku mulamwa gw’okulowooza ku bukulembeze bwe Ggwanga mu kulonda okujja, kyagamba nti kati abamulemesa basazeewo kumuvuma aggwemu amaanyi.
Kyagulanyi nga asinziira ku mukutu gwe omugatta bantu agamba nti abaagala okulemesa entekateeka ze mu by’obufuzi batandise okumujeregerera n’abamu okumuvuma basobole okumunafuya mu bantu, kyagamba nti kibalemye kubanga abantu bamanyi kye bagaala.
“Sinze mugezi asembayo mu ggwanga lino, era bulijjo ngamba abantu nti ffenna tulina okukwasiza awamu tusobole okuwangula abalabe baffe, olwo omunaku alowoozebweko, abantu ffenna tubeere kyenkanyi mu ggwanga lyaffe, eby’enfuna biterere, buli muntu agabane ku keeki ye Ggwanga lino ne bilala” Kyagulanyi bwe yagambye.
Atabukidde abantu abeeyita abayivu mu by’enfuna abagufudde omuze okuwandiika ku mikutu emigatta bantu nga bamunafuya, nagamba nti bonna abeetaaga kubanga kuba ensi okutambula yeetaaga buli alina obumanyirivu mu bitundu by’obuyivu eby’enjawulo.
Bino we bijjidde nga abantu ab’enjawulo baavuddeyo ne bamujerega nga bagamba nti bwe yabadde ku pulogulaamu ya NTV emanyiddwanga ON THE SPOT yalaze obutali bumanyirivu mu kuddamu ebibuuzo eby’amubuziddwa omuwereza Patrick Kamara naddala ebikwata ku by’enfuna.
Bano abaanukudde nagamba nti mu kifo ky’okumunafuya bandibadde bakwataganira wamu kubanga ebizibu bye Ggwanga ssi bibye yekka wabula bya bannaUganda bonna.
Do you have a story in your community or an opinion to share with us: Email us at editorial@watchdoguganda.com
