Bya Nansamba Shadia, Masaka
KOOTI e Masaka eyongezaayo okuwulira omusango gw’abayizi abagambibwa okuba nga baatekera ekisulo kye Ssomero lya St Bernards Mannya e Rakai omuliro nemufiiramu bannabwe 10 ate abalala ne basimattuka n’ebisago.
Abayizi abaleeteddwa mu kooti kubaddeko Henry Talemwa 18, Alex Mugarura 18, Edson Niyo 22 ne Dickson Kisuule 18, wamu n’omukuumi we ssomero Michael Tayebwa n’omuserikale wa Poliisi Steven Nzeyimana wabula nga babadde tebalabika bulungi ng’anabamu bawenyera.
Guno gubadde mulundi gw’akubiri ng’abayizi bano baletebwa okusomerwa emisango egibavunaanibwa okuli okutta , okulumya n’okwonoona ebintu by’essomero ate abakuumi bavunanibwa kulagajjalira mirimo gyabwe nga mu kusooka baleetebwa mu kooti y’emu nga 27/11/2018.
Omulamuzi we ddaala erisooka Christopher Adyeeri awaliriziddwa okwongezaayo omusango guno, oluvanyuma lw’oludda oluwaabi olukulirwa Amina Akasa okusaba nga bwebabadde tebanaba kumaliriza kunoonyereza kw’abwe bwatyo n’abalagira bakomezebwewo nga 10/01.2019.
Kooti etegezeddwa nti bano emisango bagizza nga 11/11/2018 bwebatekera omuliro ekisulo ekyali kisuza abayizi 56 nga ba siniya eyokusatu n’ey’okuna.
Do you have a story in your community or an opinion to share with us: Email us at editorial@watchdoguganda.com
