POLIISI mu kibuga kye Gulu ekutte era n’eggalira abadde akulira akakiiko k’ebyokulonda mu yunivasite ye Gulu nga emulanga okutataaganya saako n’okulemwa okutegeka okulonda kwa bayizi mu ttendekero lino, ekyaviiriddeko abayizi okwekyanga nga bawakanya ebyavudde mu kulonda.
Edmond Okello ye yakwatiddwa Poliisi oluvanyuma lw’okulangirira Johnson Nowe nga omuwanguzi ku kifo ky’obwaPulezidenti wa bayizi oluvanyuma lw’okulonda okwaliwo ku lw’okutaano.
Nowe Omuyizi ali mu mwaka ogw’okusatu nga akola essomo ly’okulongoosa abalwadde yalangiriddwa Okello nga agamba nti yafunye obululu1,403 abayizi n’abakulira ettendekero lino kye bawakanyizza.
Ono yategezezza nti Nowe yawangudde Samuel Oyet Agwani bwe baabadde ku mbilanyi nga ono asoma busomesa gwe yagambye nti yafunye obululu 750 bwokka.
Wabula olwamaze okulangirira abamu ku bawagizi ba besimbyewo baatandise okuwakanya ebyavudde mu kulonda nga bagamba nti Okello yabadde yeekobaanye ne gwe yalangiridde okusobola okufuna obuwanguzi, nga nabamu baategezezza nti omuwendo obululu bwabadde butono nnyo nga kino kye kimu ku byamuviiriddeko okukwatibwa.
Omwogezi wa Poliisi mu kitundu kya Aswa Jimmy Patrick Okema yagambye nti Okello bamukutte mu ngeri y’okumuwonya abayizi abaabadde baagala okumumiza omusu era nga kati akuumirwa ku Poliisi ye Gulu
Omwogezi wa kakiiko ke by’okulonda mu yunivasity ye Gulu Emmanuel Ochan yakakasizza nga ddala kituufu obululu obwakubisiddwa akakiiko k’ebyokulonda bwabadde butono.
Yagambye nti abalonzi baabadde 5000 ate nga obululu bwabadde 3000 bwokka ekyareesewo okutankana, ate nga n’okulonda kwayimiriziddwa ku ssaawa kkumi mu kifo kya kkumi n’emu.
Do you have a story in your community or an opinion to share with us: Email us at editorial@watchdoguganda.com
