ABABAKA ba Palimenti abaakazibwako okuba abayekera be kibiina NRM baganiddwa okwegatta ku banaabwe abagenda mu lusilika olugenda okubeera e Kyankwanzi.
Kino kibikkuddwa omwogezi w’akabondo ka babaka ba NRM mu Palimenti Hon. Margaret Muhanga bwabadde ayogerako n’abamawulire ku Media Centre mu Kampala ku bikwata ku lusilika oluyitiddwa omukulembeze we kibiina era nga ye mukulembeze we Ggwanga Yoweri Kaguta Museveni amangu ddala, olutandika nga 13 okutuuka nga 20 omwezi guno.
Muhanga ategezezza nti tebayinza kukkiriza Babaka bano kubegattako mu lusilika luno kuba ennaku zino bafuuse bamutawana nnyo eri ekibiina, nga buli kintu ekikolebwa ekkibiina bawakanya kiwakanye kakibe kilungi, nagamba nti tebakyabeetaaga.
Amenyeko amannya 6 okuli Gaffa Mbwatekamwa, Patrick Oshabe Nsamba, Barnabas Tinkasimire, Monicah Amonding, John Baptist Nambeshe ne Theodral Sekikubo bayogeddeko nti tebakyabatwala nga bannakibiina abajjuvu.
Muhanga anyonyodde nti obukulembeze bwe kibiina obwa waggulu bwakizuula nti abantu bano tebakyetagisa mu nkiiko zaabwe kubanga buli lwe babayita bawakanya buli kimu nga baba baagala kuleta kavuyo mu lukiiko, nga tebakyalina n’amutima gwa Nsi yaabwe.
“Mukimanyi bulungi nti ababaka abagaana ekiteeso ky’okujja ekkomo ku myaka gya Pulezidenti baali 28, naye mulowooza lwakia aalala tubakkirizza okutwegattako? tubakkirizza kubanga ebyo bwe byaggwa tebagenda mu maaso n’akulwanyisa nkola z’akibiina, era tubadde tutambula nabo bulungi era e Kyankwanzi tugenda kubaayo nabo.” Muhanga bwe yagambye
“Ekitutwala e Kyankwanzi si kukakasa kya kwesimbawo kwa Pulezidenti Museveni nga tavuganyiziddwa mu kibiina nga abamu bwe babityebeka, wabula tugenda kwekeneenya mirimu egikoleddwa kasookedde tukwata buyinza, era omulamwa gugenda kubeera Okutandikawo amakolero okusobola okutondawo emirimu ku lwe nkulakulana, naye era bwe wanabaawo ekyetagisa okwogera ku by’obukulembeze tetujja kugaana kubiteesaako.” Muhanga bwe yayongeddeko.
