Amaggye geddizza emirimu gy’okuzimba amalwaliro mu Ggwanga lyonna

EGGYE lya UPDF lye ligenda okukwasaganya eddimu ly’okuzimba amalwaliro gonna mu Ggwanga.

Kino kiddiridde omukulembeze we Ggwanga era nga ye muduumizi wa maggye ow’okuntikko okulagira Minisitule ye by’obulamu okuwa emirimu gyonna ekitongole kya maggye ekizimbi Engneering Brigade.

Mu mwezi gw’omusanvu omwaka guno Pulezidenti Yoweri Kaguta Museveni yalagira amassomero saako n’amalwaliro gonna agaali galina okuzimbibwa mu mwaka gwe by’ensimbi 2021-2022 gonna okuwebwa ekitogole kya maggye ekizimbi kikole emirimu gyonna.

Mu ngeri eyo omuteesiteesi omukulu mu Minisitule ye by’obulamu Dr. Diana Atwine mu bbaluwa gye yawandiise nga 29 omwezi oguwedde yalagidde abakulira abakozi mu ma Disitulikiti gonna saako ne mu Munisipaari zonna okwetoloola e Ggwanga nga abategeeza okutekesa mu nkola ekilagiro kya Pulezidenti nga bazimba amalwaliro mu bitundu gye bali.

Yagambye nti abakulira abakozi ba Gavumenti balina okuwaayo ebifo byonna awagenda okuzimbibwa amalwaliro eri ekitongole ekizimbi mu Ggye lya UPDF, era amangu ddala batandike okukola.

“Omulimu gwammwe ogugenda okubeera omukulu kwe kufuuka bakalabalaba be mirimu gyonna okusobola okulaba nga gigenda bulungi saako ne mirimu emilala egy’ekikugu” Atwine bwe yategezezza ba CAO ne ba Town Clerk.

Ku ntandikwa y’omwaka guno Pulezidenti Museveni yategeeza nti ekitongole kya maggye ekizimbi kyali kimaze okufuna obukugu mu kuzimba, nti era kyali kisobolera ddala okukwata ku mirimu eminene olwo embeera y’okukandaliriza emirimu okuva eri ba Kontulakita yali eyolekedde okukoma.

Yategeeza nti mu kiseera ekyo yali akizudde nti ba Kontulakita baali bakola emirimu gadibe ngalye saako n’okulwawo okumaliriza olwo bannaUganda obuzibu bwonna ne babutikka Gavumenti ye kye yagamba nti kilina okukoma nga amaggye ge gakutte ku mirimu gino.

“Ekilungi amaggye go ngesobolera kubanga bbo balina ne kkooti yabwe gye tubavunanira (Court Matial) bwe baba basobezza sso ssi kkooti zino ezamwe ezirina emitendera gye sitegeera bulungi” Museveni bwe yagamba