ENTEKATEEKA ya Pulezidenti ey’okuggya abavubuka mu bwaavu emanyiddwa nga youth livelihood programme eyongeddwaayo emyaaka emirala etaano kisobozese abavubuka okutondawo emirimu saako n’okukendeeza ku muwendo gwabo abagenda ebweru we ggwanga nga banoonya emirimu.
Enkola eno eyatandika mu mwaka gwa 2014 nga yali ya kumala emyaaka etaano, era ebadde eggwaako mu guno, okutuusa olukiiko lwa ba Minisita ne palimenti bwe baagyongedde ebbanga eddala.
Bino byaatuddwa omuwandiisi ow’enkalakkalira mu ministule y’ekikula ky’abantu Pius Bigiriman bwe yabadde awaayo pikipiki 65 ne kompyuta eri ba ssentebe b’abavubuka mu musupaali zonna, ba ssentebe b’abavubuka mu distulikiti ez’akatondebwaawo, abakulira enkola ya YLP n’ey’abakyaala eya UWEP mu distulikiti eziwerako nga kwe kuli ne KCCA.
Ng’abakwaasa pikipiki zino ne kompyuta wali ku Kireka Rehabilitation Centre, Bigirimana yasiimye kkampuni ya Simba Automotive olw’okuba ensaale mu kukolera kuno pikipiki, n’agamba nti bakoze kinene mu kwanukula omulanga gwa Pulezidenti ogwa Bannayuganda okugula ebikolerwa kuno.
Ate sentebe w’olukiiko lw’abavubuka olw’eggwanga Muky. Lilian Aber yakubirizza abafunye pikipiki zino okuzikozesa okwagazisa abavubuka okusasula amangu amabanja mu ntegeka eno, kisobozese n’abalala bangi okuganyulwa mu kaweefube w’okweggya mu bwaavu.
Ssenkaggale wa Simba Automotive Paresh Shukra yalaze essanyu okuba nti kkampuni yaabwe y’esoose okukolera kuno pikipiki, mu ngeri eyo ne baba abasaale mu kwaanukula omulanga gwa Pulezidenti ogw’okutumbula amakolera ga kuno.
“Lino kkubo kkulu nnyo mu kutumbula Pulezidenti ky’atusaba nga Bannayuganda okugula ebikolerwa kuno”, Shukra bwe yagambye.
Comments
