OMUYIZI mu ttendekero lye Kyambogo ebigambo tebimugendedde bulungi enkya ya leero, bwakedde ne yegatta ku bayizi banne okwekalakaasa nga bawakanya abakulira Univasite eno okwongeza ebisale, kyokka Poliisi bw’ekasuse akakebe ka ttiya gaasi ne kagaana okwabika n’asalawo akagiddizi ne kamwabikira mu ngalo nekamukutulako omukono.
Ono ategerekeseko erya Abraham lyokka akola Diploma mu ssomo ly’okukanika emmotoka n’amasanyalaze, era nga addusiddwa mu ddwaliro nga eggalo ez’omukono gwe ogwa ddyo zonna zikutuseeko.
Bayizi banne bategezezza nti basoose ne bamulabula obutetantala kukwata ku kakebe ka ttiya gaasi abadde kagaanye okwabika wabula nagaana era ekiddiridde kwe kugezaako okukakasuka ne kamwokya engalo zonna.
Bano okwekalakaasa babadde bawakanya enkola eyatereddwawo abakulira Yunivasite eno nga buli muyizi alina okusasula ensimbi zonna mu sabiiti 12 zokka nga analemererwa wakugobwa oba okufiira omwaka gwe.
.
