Bya Moses Kizito Buule
ABATWALA eby’enjigiriza mu Munisipaari ye Mukono bavudde mu mbeera ne bakwata ku nkoona omusawo w’essomero lya Global Junior school elisangibwa ku luguudo oludda e Kayunga nga bamulanga okusiiwuuka empisa n’alagira abayizi 6 basiimuule ebisenge by’eddwaliro lye ssomero nga bakozesa ennimi zaabwe.
Kino kidiridde omuzadde w’oomu ku baana Esther Banyenzaki okufuna amawulire okuva ku mwana we (amannya agasirikiddwa) nga amutegeeza nti nga 2 omwezi guno omusawo we ssomero lino yamulagira ne banne abalala 5 okusiimuula wansi w’ekimu ku bisenge omujjanjabirwa abaana ababa balwadde nga bakozesa ennimi zaabwe, kubanga baali bakyafuwazaawo bwe baali banywa amata nga bwe balinda obujjanjabi.
Banyenzaki yagambye nti omwanawe yamala ekiseera nga alinga aliko kyayagala okumugamba nga kya kyama, era namunyonyola engeri omusawo we ssomero gye yabakakamu okukozesa ennim zaabwe okukomba amata agaali gayiise wansi ekyamukola obubi eyennyo, amangu ago yagenda ku ssomero lino nagezaako okw’ogera n’abakulira essomero lino omwali alikulira Anthony Kato Ssentongo kyokka yagenda okulaba nga tebamufaako.
Yanyonyodde nti yasalawo nga 9 omwezi guno okuddayo ku ssomero kyokka era alikulira Athony Kato n’amwekweka, oluvanyuma yatuukirira amumyuka we eyayita abaana 6 ne banyonyola eby’abatuukako nga byewunyisa ekyamuletera okujjula obusungu n’asalawo ensonga okuziyingizaamu abatwala eby’anjigiriza mu munisipaari ye Mukono.
Yatukirira atwala eby’okulambula amassomero mu Munispaari ye Mukono Olivia Bulya namutegeeza ku nsonga zino era nayimukiramu nagenda ku ssomero ye kennyini n’abuuza omusawo ono ekyamutuusa okukola ekyo.
Bulya yagambye nti omusawo yamutegeeza nti ddala kituufu yakaka abayizi okukozesa ennimi zaabwe okukomba amata agaali gayiise wansi ku seminti, nagamba nti yalina okumugoba amanngu ddala yadde nga teyalina buyinza kukola ekyo naye kyamuyitirirako.
“Ffe ab’ebyenjigiriza tetulina buyinza kugoba musawo naye tugenda kuwandikira akulira eby’obulamu mu Munisipaari ye Mukono amuwandikire mu butongole nga amugoba, kubanga tetusobola kukkiriza muntu nga oyo kukola mu baana bato” Bulya bwe yagambye.
Ye akulira eby’obulamu mu Munispaari ye Mukono Dr. Anthony Kkonde bwe yatukiriddwa bwe yatukiriddwa ku nsonga eno yagambye nti bagenda kusooka kunonyereza ku nsonga eno, era bekebejje ne mpapula z’omusawo ono zakozesa oluvanyuma bwe banakizuula nga kituufu alina we yakozesezza obubi obuvunanyizibwa bwe nga omusawo bajja kusalawo eky’okukola.
Kawefube w’okwogerako n’akulira essomero lya Global Junior school Anthony Kato Ssentongo yagudde butaka olw’essimu ze ezimanyiddwa okukubwa nga tezikwatibwa.
Do you have a story in your community or an opinion to share with us: Email us at editorial@watchdoguganda.com